Rannsóknaraðferðir

Í síðustu viku voru staðlotur í náminu mínu. Ég er að leggja stund á tvennskonar rannsóknaraðferðir á þessu vormisseri. Fyrst sat ég staðlotu í eigindlegum rannsóknaraðferðum. Í þessari lotu var megin markmiðið að setja okkur inn í námsefni áfangans og rifja upp hvað eru eigindlegar rannsóknaraðferðir. Eigindlegar rannsóknaraðferðir eru notaðar ef markmiðið er að grafast fyrir um hvaða merkingu eða skilning fólk leggur í ákveðna hluti. Slíkar rannsóknir byggja á viðtölum við einstaklinga og/eða hópa um ákveðið málefni. Bæði einstaklingsviðtöl og rýnihópar falla undir eigindlegar rannsóknaraðferðir. Aldrei er hægt að alhæfa útfrá niðurstöðum sem fengnar eru með þessum hætti yfir á stærri hóp heldur veita eigindlegar rannsóknir dýpri innsýn í viðfangsefnið.
Við vorum sett í hópa í lok kennslunnar og þar ræddum við um hverskonar verkefni við höfum hugsað okkur að vinna að. Þar sem að ég hef ákveðið að verkefnið mitt er ekki rannsókn ætla ég að vinna að eigindlegri rannsókn í þessum áfanga sem gæti hugsanlega nýttst mér í greinagerð með verkefninu. Mig langar að skoða hvernig innleiðing á iPad hefur gengið í grunnskólum Kópavogs og til þess að rannsóknin verði ekki of yfirgripsmikil þá ætla ég að einbeita mér að einum grunnskóla.

Í lok vikunnar var ég í staðlotu í starfendarannsóknum. Ég er mjög heilluð af þeirri rannsóknaraðferð og sé að hún muni nýtast mjög vel í leikskólanum. Ég hef í gegnum árin fylgst með nemum sem hafa komið til okkar í leikskólann og notað þessa aðferð. Ég hef einnig verið þátttakandi í slíkum rannsóknum í gegnum tíðina.
Seinni daginn í staðlotunni vorum við fengin til þess að setja fram rannsóknarspurningu og ákvað ég þar sem ég er ekki starfandi á vettvangi leikskólans að rannsaka sjálfa mig. Ég er í mörgum hlutverkum dag hvern og það kom nokkuð óvænt uppá að ég varð námsmaður að nýju, þess vegna finnst mér upplagt að skoða hvernig ég get fundið jafnvægi á milli þessara ólíku hlutverka. Ég ætla að halda rannsóknardagbók og skrá hjá mér ferlið og svo ætla ég að rannsaka einnig hvaða tól og tæki ég finn til þess að gera mér lifið auðveldara. Hvað hefur reynst mér best og hvað get ég haldið áfram að nýta mér í framtíðinni.
Þetta er allt mjög spennandi og hlakka ég til að takast á við námið samhliða öllu því sem ég er að gera dags daglega.
Læt hér fylgja með flæðirit sem ég skilaði áðan í starfendarannsóknum. Við áttum að segja frá því af hverju við erum í því námskeiði.

Nýleg öpp/smáforrit

Ég ætti sennilega að skrifa í fyrirsögnina öpp/smáforrit sem ég er nýlega farin að nota. Það bara verður svo löng fyrirsögn. Hvað um það ég ætla semsagt að segja ykkur frá smáforritum sem mér hefur nýlega verið bent á og ég byrjaði strax að nota í starfi og einkalífi.

BULLER

BULLER er smáforrit sem allir kennarar eiga að hafa í símanum sínum. Smáforrit sem mælir hávaða í umhverfinu. Ég get sýnt börnunum í símanum mínum hversu mikill hávaði er í stofunni og þau lækka sig með það sama. Forritið er mjög sjónrænt og litaglatt. Á meðan að græniliturinn ríkir erum við í góðum málum, en þurfum að hafa gát á þegar gula ljósið kemur og lækka okkur heldur betur þegar ljósið er orðið rautt. Það var vinnueftirlitið í Noregi sem lét útbúa þetta smáforrit.


GOOGLE TRANSLATE

Google Translate smáforritið er alger snilld. Það er auðvitað ekki ný uppgvötun að nýta sér Google Translate til þess að þýða yfir á önnur tungumál. Nýjungin felst aðallega í því að nýta appið/smáforritið í daglegu spjalli við foreldra af erlendum uppruna í leikskólanum. Þá er ég aðalega að tala um þann möguleika að geta þýtt íslensku eða ensku yfir á annað tungumál og nota míkrafón möguleikann. Þannig getum við með auðveldum hætti spjallað saman og það er merkilegt nokk hvað við skiljum hvert annað með þessum hætti. Stutt skilaboð eins og um foreldrafund, barnið fór í gönguferð, vantar pollagalla, bleiur og slíkt verða leikur einn með þessu smáforriti. Hvet alla kennara til þess að nýta sér þessa snilld og gera þannig foreldra upplýstari um hagi barnanna frá degi til dags. Hér er áhugaverður sjónvarpsþáttur um tilurð þessa frábæra smáforrits. Hér er svo upptaka sem sýnir hvernig við getum notað samtalsþátt smáforritsins.  Ég er búin að vera að prófa þetta með pólskum foreldrum og þetta svínvirkar.

PERISCOPE

Periscope smáforritið er nýkomið á markað og er ætlað til beinnar útsendingar á efni. Eigendur þess og framleiðendur eru þeir sömu og eiga Twitter, en þú þarft samt ekkert að tengja það saman frekar en þú vilt. Ég er ekki mikið búin að vera að prófa það, en svona smávegins samt og þá aðallega til þess að fylgjast með öðrum að tjá sig um hitt og þetta. Smáforritið er ætlað til þess að streyma á Netið viðburðum í rauntíma. Það verður að teljast líklegt að þetta smáforritið verði nýjasta æðið (Trendið) í unglingaheimnum. Sennilega kemur það líka til með að marka straumhvörf í fjölmiðlaumfjöllun. Með því er hægt að sjónvarpa um alla veröld því sem er að gerast t.d. á hamfarasvæðum, í stríði o.s.frv. Hér er sýnt hvernig hægt er að nota forritið.Hér eru líka leiðbeiningar.

Alþjóðlegur dagur kennara

Í tilefni af Alþjóðadegi kennara mánudaginn 5. október ákvað ég að gefa þeim sem fylgja mér á samfélagsmiðlum smá innsýn í starfið mitt. Sendi þannig inn reglulega yfir daginn myndir ásamt texta þar sem ég sagði frá því hvað ég var að fást við.
Fyrstu færsluna sendi ég inn á samfélagsmiðla rétt upp úr átta um morguninn. Þá var ég byrjuð að kenna. Fyrst á morgnanna stýri ég leikhópi þar sem lögð er áhersla á málþroska/læsi. Í leikhópnum nota ég yfirleitt alltaf iPad og þá smáforritið hennar Bryndísar Guðmunds talmeinafræðings Lærum og leikum með hljóðin.
Ég er afar ánægð með þetta smáforrit og sé miklar framfarir hjá börnunum mínum, sér í lagi þeim sem ekki hafa íslensku sem móðurmál.

Eftir smá kaffipásu tók við kennsla elstu barnanna. Þau koma alltaf til mín í upplýsingatækni einu sinni í viku. Ég er að gera tilraun með að kennna þeim í hóp fjórum í einu og legg þá áherslu á eitt smáforrit í senn. Við hófum vinnu við skemmtilegt verkefni í vikunni á undan. Börnin sömdu sögu og gerðu söguborð við hana. Í þessum tíma var því komið að því að útbúa persónur og leikendur í sögunni og einnig þá bakgrunna sem þau vilja nota við sögugerðina. Börnin eru að læra á smáforritið Pubbet Pals. Þau læra að útbúa eigin sögu alveg frá grunni. Þetta var alveg einstaklega skemmtileg kennslustund enda börnin afar hugmyndarík og klár. Þau nýttu vel efniviðinn sem var í boði og höfðu ákveðnar skoðanir á því hvernig þau vildu hafa söguna.

Eftir hádegisverð er komið að hvíld og bóklestri. Ég er svo heppin að fá að lesa fyrir nokkur elstu barnanna og valdi að byrja á bókinni Tröllagleði. Við lásum ca. 1/3 af henni og fórum svo í smáforrit sem heitir Froskaleikur og er eins og Lærum og leikum með hljóðin úr smiðju Bryndísar Guðmundsdóttur. Frábært forrit sem börnin eru afar spennt yfir því við erum svo lengi að fara í gegnum það allt. Höfum núna verið í þrjár vikur að vinna í því og erum ekki ennþá búin að komast í kastalann. Það styttist samt í það og þess vegna eru börnin afar spennt orðin.

Eftir hádegi tók svo aftur við vinna með elstu börnunum. Núna voru það aðrir tveir hópar sem komu í upplýsingatæknitíma.Eins og um morguninn þá vorum við að skapa persónur og leikendur, bakgrunna og æfa okkur í forritinu Pubbet Pals. Mikið rosalega hef ég gaman af því að vera með þeim í þessari vinnu. Börnin eru svo skemmtileg og hugmyndarík. Hægt er að fylgja okkur eftir hér.

Rétt fyrir kl. 16 hentist ég svo úr leikskólanum og náði rétt svo í tæka tíð á málþing um samfélagsmiðla sem haldið var í tilefni Alþjóðadags kennara á Grand Hótel. Þar voru mjög áhugaverð erindi flutt um notkun samfélagsmiðla í kennslu. Ég hélt áfram að senda inn myndir á samfélagsmiðla frá þessum viðburði. Hægt er að sjá og hlusta á erindin hér.

Það var eftirminnilegt þegar Ingvi Hrannar lét þrjá sjálfboðaliða tæma tannkremstúpu, sjampóbrúsa og raksápu. Hætti svo við í miðjum klíðum og bað fólkið um að taka efnið til baka. Það var auðvitað ekki hægt og svipurinn á þeim var óborganlegur. Þetta gerði hann til þess að sýna verklega fram á það hversu varkár við verðum að vera á samfélagsmiðlum. Það sem við skrifum og setjum á miðlana er ekki aftur tekið.

Alþjóðadag kennara endaði ég svo á því að útbúa Fréttabréf fyrir Faghóp um skapandi leikskólastarf. Í fyrsta sinn kom Fréttabréfið eingöngu út í rafrænu formi, áður hafði það verið útbúið í word og sent á Netið í pdf formi. Fréttabréfið útbjó ég í Tackk sem ég er afar ánægð með. Hentar ljómandi vel til þess að útbúa fréttabréf.

View Fréttabréf Faghóps um skapandi leikskólastarf full version on Tackk
Create your own customized Tackk page

Menntaspjall um sköpun í skólastarfi

Ég tók þátt í Menntaspjalli á Twitter í gær. Magnað hvað það eru margir kennarar til í að eyða frítíma sínum á sunnudegi í spjall um skólastarf. Sé það nú ekki alveg fyrir mér að margar aðrar stéttir myndu gera það sama, en hver veit.
Að þessu sinni var umfjöllunarefnið sköpun í skólastarfi og komu fram mörg sjónarmið, en almennt fannst mér á fólki að þessi mál væru í þokkalegu fari. Allavega voru þátttakendur jákvæðir og sammála um mikilvægi list- og verkgreina í skólum. Helst var að heyra (eða lesa) að það vantaði meiri samþættingu námsgreina í grunnskólanum, en það er ekki í fyrsta sinn sem ég heyri það. Flestir voru sammála um mikilvægi þekkingar og færni þeirra kennara sem hafa menntað sig á sviði list- og verkgreina og þess að aðrir kennarar þurfi að njóta þekkingar þeirra. Ég er á því að það eigi að vera til "sköpunartorg" alveg eins og UT torg, tungumálatorg og fl.
Það er spurning hvort Menntamiðja komi ekki til með að þróast áfram og taki þetta verkefni að sér.
Hér má sjá samantekt viðræðananna.

Læsi er lykill

Föstudaginn 14. ágúst var haldin ráðstefnan Læsi er lykill á vegum Samtaka áhugafólks um skólaþróun. Ráðstefnan stóð svo sannarlega undir væntingum mínum og hvet ég heilshugar fólk til þess að kynna sér skjákynningar fyrirlesara.
Fyrir hádegi voru frábærir fyrirlestrar í Háskólabíó, en ég var sérlega hrifin af fyrirlestri Fríðu Bjarneyjar þar sem hún fjallaði um þróun bernskulæsis og galdurinn við að kveikja áhuga allra barna á tungumálinu. Fríða Bjarney hefur unnið mjög gott starf með tvítyngdum börnum og kennurum þeirra.
Eftir hádegi voru í boði margar mismunandi málstofur og vinnustofur. Ég valdi fyrst að fara í vinnustofu með þeim Birte Harksen, Söru Grímsdóttur og Geirþrúðu Guðmundsdóttur sem unnið hafa með leikskólabörnum að því að efla læsi í gegnum dans, tónlist, leiki og takt. Birte heldur úti frábærum vef sem ég hef notað mikið undan farin ár Börn og tónlist.
Í lok dagsins fór ég svo í málstofu með þeim Svövu Pétursdóttur og Tryggva Thayer sem þau kölluðu upplýsingalæsi.
Það var mjög gaman í málstofunni enda umræðuefnið afar áhugavert fyrir mig. Sérstaklega umræðan um "Síubólur". Ég hafði ekki velt því fyrir mér að þær hefðu neikvæðar hliðar, heldur finnst mér eins og fleirum afar þægilegt á stundum þegar mér er vísað á efni sem ég hef áhuga á. Gott stundum að þurfa ekki að hugsa of mikið, eða þannig. Auðvitað er þetta svo ekki svona einfalt og getur í framtíðinni verið mikil ógn og skoðanamyndandi fyrir fólk.
Hér er ágætis myndband þar sem fjallað er um Síubólur eða Filter Bubbles.

Snilldar bók

Ég bara verð að segja ykkur að þessi bók The free education technology resources eBook er algerlega að mínu skapi og er ókeypis í þokkabót. Þarna er vísað í 200 frí verkfæri til þess að nýta í kennslu og ekki nóg með það heldur er vísað á efni til þess að læra að nota þau líka. Getur kona beðið um meira?

Tackk prófað

Jæja, þar kom að því að ég fann not fyrir Tackk, búin að hlusta á þetta form dásamað í hástert. Ekki það að ég sé því ekki sammála, var bara ekki búin að finna til hvers ég gæti notað það.
Núna áðan fann ég sem sé leiðina. Þannig er að ég er vefstjóri hjá Faghópi leikskólasérkennara og það fylgir starfinu að setja upp reglulega Fréttabréf fyrir faghópinn. Fréttabréfið hefur alltaf verið sent rafrænt á félagsmenn og birt á heimasíðunni, en núna fór ég semsé alla leið.

Vola!! hér er Fréttabréf Faghóps leikskólasérkennara í Tackk.

Menntavarp um Samspil 2015

Ég var að hlusta á Menntavarp þeirra Ragnars og Ingva Hrannars áðan. Í þetta sinn var Bjarndís Fjóla þátttakandi og umræðuefnið var Samspil 2015. Þau fóru vítt og breytt yfir í umræðunni sem var mjög jákvæð. Þau ræddu m.a. um ábyrgð þeirra sem kunna aðeins meira fyrir sér í upplýsingatækni að hjálpa hinum sem eru óöruggir í tækninni. Ég er algerlega sammála þeim þar því það er alveg nauðsynlegt og það er einmitt tilgangur Samspils 2015 verkefnisins. Takk kærlega fyrir umræðuna.

Menntaspjall á Twitter

Það var mikið fjör á Twitter #menntaspjall (inu) í gær. Man bara ekki eftir svo fjölmennu spjalli áður. Frábært hvað kennarar eru duglegir að leggja það á sig á sunnudagsmorgni að taka þátt í spjalli með kollegum sínum.
Í þetta sinn var ekkert ákveðið þema í gangi, heldur var leitað eftir spurningum hjá öllum fyrir laugardagssíðdegið og svo völdu þeir Tryggvi og Ingvi Hrannar umsjónarmenn menntaspjallsins úr spurningunum. Yfirskriftin að þessu sinni var því „Úr öllum áttum“. Hér má sjá samantekt Ingva Hrannars á því sem fram fór.

Menntaspjall - Samstarf skólastiga

Í dag var #menntaspjall á Twitter sem ég tók að mér að stjórna. Ingvi Hrannar tók saman umræðurnar svo hægt er að skoða þær hér.

Vefnámskeið með Richard Byrne

Mjög seint á s.l. fimmtudagskvöld (skírdag) tók ég þátt í vefnámskeiði (Best Backchannel and Informal Assessment Tools) hjá Richard Byrne. Richard þessi heldur reglulega svona stutt námskeið þar sem hann fjallar um margskonar veftól sem hægt er að nýta í námi og kennslu. Námskeiðið var fjölmennt og þátttakendur héðan og þaðan úr veröldinni. Richard, sem er Íslandsvinur og á leið í sína þriðju ferð til landsins, er afar afkastamikill bloggari (Free Technology for teachers) og óspar á góð ráð og hugmyndir um það á hvern hátt við kennarar getum nýtt upplýsingatækni í starfi okkar við kennslu.
Námskeiðið fór fram í vefkerfi sem heitir Training Wiewer. Bráðsniðugt tól til þess að halda svona stutt námskeið. Richard tók upp námskeiðið jafnóðum svo þið getið séð og heyrt það hér. 

Á námskeiðinu fjallaði hann m.a. um eftirfarandi veftól sem eru ókeypis:

Todays Meet sem er mjög sniðugt til þess t.d. að nota í bekknum, þá geta börnin skipst á hugmyndum, lagt inn fyrirspurnir til hvers annars eða fjallað um eitthvað ákveðið efni. Nemendur geta t.d. safnað saman heimildum sem varða ákveðið verkefni sem þau eru að vinna að. Möguleikarnir eru í raun óþrjótandi.

Tozzl er svipað kerfi, en hefur þó meiri möguleika á að deila ljósmyndum og myndböndum til þess að kalla fram umræðu í bekknum. Mér sýndist þetta kerfi sniðugra og auðveldara í notkun, gæti líka hentað með mjög ungum börnum. Hægt er að vista umræðuna sem fór fram og líka að senda hana í tölvupósti.

QR Droid Zapper sem er forrit til þess að útbúa QR kvóða til þess að vísa nemendum á viðeigandi verkefni. Börn hafa svakalega gaman af slíkum kvóðum, það hef ég reynt sjálf í leikskólanum.

Padlet er sniðugt til þess að vinna með börnum og Richard sýndi nokkra einfalda möguleika á að nýta það kerfi í kennslu. Hér er líka kennslumyndband á hvern hátt hægt er að nota Padlet sem hann hefur gert og sett á YouTube.

Socrative er skemmtilegt til þess að útbúa t.d. spurningar. Hægt er að fara í spurningaleiki með nemendum og það þykir þeim ákaflega skemmtilegt. Reyndar gekk kerfið ekki alveg upp hjá okkur þetta kvöld, netsambandið var ekki nógu tryggt.

Kahoot er að mínu mati einfaldara kerfi til þess að útbúa skemmtilega spurningarleiki. Það er mun sjónrænna og því heppilegra fyrir t.d. ung börn. Börnunum í leikskólanum þykir mjög gaman að fara í svona spurningarleiki.

81Dash er kerfi til þess að nota með bekknum á svipaðan hátt og hin kerfin sem ég benti á hér á undan. Þú getur sent nemendum skilaboð og vísað þeim á ákveðið efni og sett inn krækjur og verkefni sem börnin eiga að vinna að.

Frábært að taka þátt í svona örnámskeiðum á Netinu og mæli ég með að allir prófi að taka þátt.

Takk fyrir mig Richard Byrne.

Pinterest

Ég nota Pintarest af því mér finnst það afar þægileg leið til þess að halda utan um góðar hugmyndir sem ég finn á ferð minni um Netheima. Bæði hugmyndir sem ég get nýtt mér í starfi og í einkalífi.  Ég kynntist Pintarest fyrst þegar ég var á námskeiði í  upplýsingatækni í Tralee á Írlandi sumarið 2013, en það var samt ekki fyrr en síðasta sumar sem ég fór fyrir alvöru að nota vefsvæðið mitt. 
Ég var og er með annað vefsvæði til þess að fylgjast með ýmsum vefsíðum, en Pintarest er að mínu mati þægilegast til þess að geyma góðar hugmyndir.
Það sem er svo þægilegt við þetta svæði er að allir geta „pinnað“ frá öllum. Þannig getur maður elt uppi fólk sem hvefur svipaðan áhuga og séð hvað þeir eru að pinna. Ég fæ upplýsingar um það hvað fólk sem t.d. hefur áhuga á handavinnu eða  iPad í kennslu finnur og get þá skoðað jafnóðum hvort það er eitthvað sem gæti gagnast mér og þá pinnað á mína síðu.
Það eru sem betur fer alltaf fleiri og fleiri vefsvæði sem eru að uppgötva markaðsgildi Pintarest og bjóða upp á beina tengingu líkt og gert er við fésbókina og twitter.

Ég mæli með því að kennarar gefi Pinterest gaum og skoði hvort vefsvæðið henti þeim.

Hér er mitt Pinterest svæði:  https://www.pinterest.com/fjolath/