Alþjóðlegur dagur kennara

Í tilefni af Alþjóðadegi kennara mánudaginn 5. október ákvað ég að gefa þeim sem fylgja mér á samfélagsmiðlum smá innsýn í starfið mitt. Sendi þannig inn reglulega yfir daginn myndir ásamt texta þar sem ég sagði frá því hvað ég var að fást við.
Fyrstu færsluna sendi ég inn á samfélagsmiðla rétt upp úr átta um morguninn. Þá var ég byrjuð að kenna. Fyrst á morgnanna stýri ég leikhópi þar sem lögð er áhersla á málþroska/læsi. Í leikhópnum nota ég yfirleitt alltaf iPad og þá smáforritið hennar Bryndísar Guðmunds talmeinafræðings Lærum og leikum með hljóðin.
Ég er afar ánægð með þetta smáforrit og sé miklar framfarir hjá börnunum mínum, sér í lagi þeim sem ekki hafa íslensku sem móðurmál.

Eftir smá kaffipásu tók við kennsla elstu barnanna. Þau koma alltaf til mín í upplýsingatækni einu sinni í viku. Ég er að gera tilraun með að kennna þeim í hóp fjórum í einu og legg þá áherslu á eitt smáforrit í senn. Við hófum vinnu við skemmtilegt verkefni í vikunni á undan. Börnin sömdu sögu og gerðu söguborð við hana. Í þessum tíma var því komið að því að útbúa persónur og leikendur í sögunni og einnig þá bakgrunna sem þau vilja nota við sögugerðina. Börnin eru að læra á smáforritið Pubbet Pals. Þau læra að útbúa eigin sögu alveg frá grunni. Þetta var alveg einstaklega skemmtileg kennslustund enda börnin afar hugmyndarík og klár. Þau nýttu vel efniviðinn sem var í boði og höfðu ákveðnar skoðanir á því hvernig þau vildu hafa söguna.

Eftir hádegisverð er komið að hvíld og bóklestri. Ég er svo heppin að fá að lesa fyrir nokkur elstu barnanna og valdi að byrja á bókinni Tröllagleði. Við lásum ca. 1/3 af henni og fórum svo í smáforrit sem heitir Froskaleikur og er eins og Lærum og leikum með hljóðin úr smiðju Bryndísar Guðmundsdóttur. Frábært forrit sem börnin eru afar spennt yfir því við erum svo lengi að fara í gegnum það allt. Höfum núna verið í þrjár vikur að vinna í því og erum ekki ennþá búin að komast í kastalann. Það styttist samt í það og þess vegna eru börnin afar spennt orðin.

Eftir hádegi tók svo aftur við vinna með elstu börnunum. Núna voru það aðrir tveir hópar sem komu í upplýsingatæknitíma.Eins og um morguninn þá vorum við að skapa persónur og leikendur, bakgrunna og æfa okkur í forritinu Pubbet Pals. Mikið rosalega hef ég gaman af því að vera með þeim í þessari vinnu. Börnin eru svo skemmtileg og hugmyndarík. Hægt er að fylgja okkur eftir hér.

Rétt fyrir kl. 16 hentist ég svo úr leikskólanum og náði rétt svo í tæka tíð á málþing um samfélagsmiðla sem haldið var í tilefni Alþjóðadags kennara á Grand Hótel. Þar voru mjög áhugaverð erindi flutt um notkun samfélagsmiðla í kennslu. Ég hélt áfram að senda inn myndir á samfélagsmiðla frá þessum viðburði. Hægt er að sjá og hlusta á erindin hér.

Það var eftirminnilegt þegar Ingvi Hrannar lét þrjá sjálfboðaliða tæma tannkremstúpu, sjampóbrúsa og raksápu. Hætti svo við í miðjum klíðum og bað fólkið um að taka efnið til baka. Það var auðvitað ekki hægt og svipurinn á þeim var óborganlegur. Þetta gerði hann til þess að sýna verklega fram á það hversu varkár við verðum að vera á samfélagsmiðlum. Það sem við skrifum og setjum á miðlana er ekki aftur tekið.

Alþjóðadag kennara endaði ég svo á því að útbúa Fréttabréf fyrir Faghóp um skapandi leikskólastarf. Í fyrsta sinn kom Fréttabréfið eingöngu út í rafrænu formi, áður hafði það verið útbúið í word og sent á Netið í pdf formi. Fréttabréfið útbjó ég í Tackk sem ég er afar ánægð með. Hentar ljómandi vel til þess að útbúa fréttabréf.

View Fréttabréf Faghóps um skapandi leikskólastarf full version on Tackk
Create your own customized Tackk page

Skólaþing 8. deildar FL og FSL á Selfossi

Ég var í dag með vinnustofu á skólaþingi á Selfossi. Þetta var einhver fjölmennasta vinnustofa sem ég hef verið með. Gekk alveg ótrúlega vel, enda þátttakendur afar áhugasamir og með á nótunum. Markmiðið með vinnustofunni var m.a. að þátttakendur yfirvinni óöryggi sitt í að nota iPadinn í leikskólanum. Það er nefnilega þannig að í mörgum leikskólum liggur iPadinn upp í hillu og enginn finnur not fyrir hann. Ég lagði áherslu á að þátttakendur setji sér markmið með notkun hans og bæti honum inn í það góða starf sem fyrir er í leikskólanum. Svo kenndi ég þeim á fjögur mjög góð smáforrit. Þátttakendur fengu góðan tíma til þess að æfa sig í öppunum og markmiðið var að þeir gætu strax á mánudeginum farið í leikskólann og byrjað að vinna með börnunum í iPadinum. Öll smáforritin eru þannig gerðar að þau ýta undir sköpun og ímyndunarafl barnanna og eru læsishvetjandi um leið. Smáforritin sem ég kenndi þeim á eru:

Book Creator

Chatter Pix

Little Story Creator

Pubbet Pals

20 mikilvæg tól til þess að nota í námi og kennslu

Vefurinn Graphite.com var að birta lista yfir þau 20 tól sem kennarar í henni Ameríku vilja meina að séu mikilvæg í námi og kennslu núna um þessar mundir. Það er athyglisvert að sjá svona lista og ósjálfrátt fer maður að máta við sig, já þetta þekki ég og þetta ekki. Allavega eru svona listar til þess að ég fer að prófa þessi tól sem svona listar benda á. Stundum gerir maður merkilegar uppgötvanir og finnur öpp sem maður getur notað strax með ungum börnum í leikskólanum. Annað er ónothæft með börnunum, en getur verið áhugavert fyrir kennarana sjálfa að nota.
Mæli með að lesendur gefi svona listum tækifæri og skoði þau tól sem bent er á.

Pubbet Pals

Í morgun var ég að vinna með nokkrum börnum í smáforritinu Pubbet Pals. Ég var að kenna þeim að útbúa persónur og bakgrunna til þess að nota í forritinu.
Í iPadinum voru fullt af myndum frá því þau höfðu heimsótt Þjóðminjasafnið í vikunni áður. Fljótlega byrjuðu börnin að nýta myndir af þeim sjálfum ásamt ljósmyndum úr ferðinni þannig að úr varð skemmtileg frásögn frá safnaferðinni. Þannig gengu þau um safnið og sögðu frá því sem fyrir augu bar. Frábær hugmynd hjá þeim og úr varð skemmtilegt myndband með frásögnum þeirra úr ferðinni á Þjóðmynjasafnið. Set inn myndbandið síðar.

Tjáning og miðlun í samþættum verkefnum

Ég tók þátt í vefnámskeiði á vegum Samspil 2015 í dag. Í þetta sinn var það Erla Stefánsdóttir frá Margmiðlunarveri Skóla og frístundasviðs Reykjavíkur.
Erla er að vinna að mörgum spennandi verkefnum í samstarfi við grunnskóla Reykjavíkur.
Erla kynnti aðeins margmiðlunarverið og þau verkefni sem framundan eru. Hún sagði m.a. að námskeiðin sem eru í boði hjá henni verði væntanlega birt á heimasíðu versins í framtíðinni.
Hún kynnti síðan eitt og annað áhugavert sem kennarar ættu að nýta sér í kennslu.

AirServer er íslenskt hugvit sem er ókeypis fyrir íslenska skóla. Með AirServer er hægt að tengja iPadinn við skjá og vinna þannig með hann þráðlaust í skólastofunni.

Turfhunt er smáleikjaforrit fyrir snjallsíma. Mjög skemmtilegt til þess að útbúa ratleiki úti. Forritið vísar nemendum á örnefni og fl. í nágrenninu. Mjög góðar leiðbeiningar eru á heimasíðu Locatify.

Erla sagði frá nokun Green screen í hreyfimyndagerð. Þá eru fígúrurnar settar fyrir framan grænan bakgrunn. Valið er í smáforritinu StoppMotion aðgerðinn "Green screen" og svo þá verður bakgrunnurinn svartur í forritinu. Þá er hægt að setja inn bæði þemu sem eru til í forritinu og sækja ljósmyndir sem við erum með í iPadinum. Skemmtilegur fídus sem ég vissi ekki af og kem örugglega til með að nota. Skemmtilega einfalt.

Erla fór einnig yfir ljósmyndatökur og á hvern hátt við getum nýtt ljósmyndir og ljósmyndun í skólastarfi. Hún lagði áherslu á að við kennum börnunum grunnatriðin og kennum þeimm ekki hvað síst að skoða ljósmyndir. Fór yfir gullinsnið sem ég hef einmitt nýtt mér mikið í kennslu elstu barnanna í leikskólanum í ljósmyndun. Hér má sjá ýmislegt um gullinsnið "rule of thirds".

Explain Everything smáforritið er algjör snilld og fór Erla aðeins yfir möguleikana í notkun þess. Frábært t.d. til þess að leyfa börnum að gera kynningar um eitt og annað.

Erla sagði einnig frá heimildagerð í grunnskólum. Af hverju ekki að kenna börnunum að nýta miðilinn til þess að börnin fræðist um leið og þau vinna að kvikmyndagerð. Hún nefndi nokkur áhugaverð dæmi. Mér finnst þetta mjög áhugavert og sé fyrir mér möguleika hjá okkur í leikskólnum með elstu börnunum.

Undirbúningur skiptir miklu máli í allri kvikmyndagerð. Til eru í dag forrit til þess að auðvelda undirbúningsvinnuna t.d. Celtex. Hér er að finna stutt myndbönd sem hægt er að nota við stuttmyndagerð. Hér er einnig myndband þar sem notaðir eru postit miðar til þess að útbúa senur í stuttmynd. Skoðið einnig vef sem Björgvin útbjó fyrir Náms.is, alveg frábær.

Frábært að hlusta á Erlu og ég fékk margar góðar hugmyndir sem gaman væri að vinna að.

Leikskólinn Myrertoppen í hreyfimyndagerð

Ég hef áður sagt ykkur frá leikskólanum sem ég heimsótti fyrir stuttu í Osló, en það er leikskólinn Myrertoppen Það nýjasta sem þau hafa verið að gera í upplýsingatækni er hreyfimyndagerð. Elstu börnin sem eru í Froskahóp gerðu þetta fína myndband með Stop Motion appinu í iPad. Hér má sjá bloggfærslu þeirra um vinnuna við myndbandið. Ég hef gert þó nokkuð af því að vinna með börnunum í leikskólanum í hreyfimyndagerð og það er alltaf jafn gaman. Fljótlega ætla ég að birta hér nokkrar myndir frá vinnu okkar.

ChatterPix Kids

Það var fjör á Lundi í Álfaheiði í morgun. Við vorum að prófa nýtt smáforrit í iPadinum sem heitir ChatterPix Kids. Börnunum fannst þetta algerlega frábært smáforrit og það var mikið hlegið. Þau geta tekið ljósmyndir eða teiknað myndir og tekið ljósmyndir af þeim. Síðan er hægt að teikna munn á það sem er á teikningunni og tala inn á. Þegar því er lokið þá er hægt að skreyta myndina að vild með ýmsum smámyndum, breyta litasamsetningum, gera ramma og fl. Myndin vistast svo í myndagallerí, en það er líka hægt að senda (export) hana sem myndband inn í myndaalbúm iPadsins.

Hér má svo sá afraksturinn:

Málþing Hafnarfjarðar um læsi

Föstudaginn 25. febrúar s.l. tók ég þátt í einhverju því stærsta málþingi sem haldið hefur verið hér á landi. Málingið var haldið á Hilton Hótel og voru þátttakendur um 900 manns, allt starfsmenn leik- og grunnskóla Hafnarfjarðar. Málþingið bar yfirskriftina "Lestur er lífsins leikur - málþing um lestrarundirbúning og lestrarnám fyrir starfsfólk leik- og grunnskóla Hafnarfjarðar."
Mitt hlutverk í málstofu var að flytja erindi um heppileg smáforrit til þess að efla læsi í leik- og grunnskólum. Þar sem mér fannst ég ekki geta fjallað um efnið án þess að benda á mikilvægi þess að líta beri á spjaldtölvur sem verkfæri til þess að nálgast ákveðin markmið í kennslu byrjaði ég erindið á því að fjalla um það og benda á hvað er vel gert í kennslu að mínu mati. Í kjölfar erindi míns á málþinginu fékk ég endalausar fyrirspurnir um sama efni svo ég ákvað að setja inn grein á Appland þar sem ég fjalla sérstaklega um smáforrit sem eru heppileg til þess að efla málþroska barna.

Útikennsla í leikskólum með iPad og/eða iPhone

Í janúar skrifaði ég grein sem birt var á Appland. Þar var ég að benda á nokkur skemmtileg og hentug öpp til útikennslu, en ég fæ alltaf reglulega nokkrar fyrirspurnir um það. Þó svo að ég miðaði upplýsingarnar við leikskóla þá ættu þær að henta einnig grunnskólakennurum.